You are here: Home » buddhism » ma » ma46
← ma45 
 ma47 →

MĀ46 hryapatrāpyasūtram

madhyamāgame'bhyāsasaṃyuktavarge pañcame hryapatrāpyasūtraṃ pañcamam.

evaṃ mayā śrutam. ekasminsamaye bhagavān śrāvastyāṃ viharati sma jetavane'nāthapiṇḍadasyārāme.

tasminsamaye āyuṣmāñchāriputro bhikṣūnāmantrayata — āyuṣmanto yadi bhikṣurahrīko bhavatyanapatrāpī sa premagauravamupahanti. asati premagaurave sa śraddhāmupahanti. asatyāṃ śraddhāyāṃ sa samyaksaṅkalpamupahanti. asati samyaksaṅkalpe sa samyaksmṛtisamprajanyamupahanti. asati samyaksmṛtisamprajanye sa indriyasaṃvaraṃ śīlasaṃvaramavipratisāraṃ prāmodyaṃ prītiṃ praśrabdhiṃ sukhaṃ samādhiṃ yathābhūtajñānadarśanaṃ nirvedaṃ virāgaṃ vimuktiṃ copahanti. asatyāṃ vimuktau sa nirvāṇamupahanti.

tadyathāyuṣmanto vṛkṣasya yadi bāhyatvagupahanyate tadāsyāntartvagapi na sampadyate, antartvaci cāsampadyamānāyāmasya kāṇḍaskandhau sāraḥ parvāṇi śākhāpalāśaṃ puṣpaphalāni ca sarvāṇi na sampadyante. evamevāyuṣmanto jñātavyaṃ bhikṣurapyevameva. yadi bhikṣurahrīko bhavatyanapatrāpī sa premagauravamupahanti. asati premagaurave sa śraddhāmupahanti. asatyāṃ śraddhāyāṃ sa samyaksaṅkalpamupahanti. asati samyaksaṅkalpe sa samyaksmṛtisamprajanyamupahanti. asati samyaksmṛtisamprajanye sa indriyasaṃvaraṃ śīlasaṃvaramavipratisāraṃ prāmodyaṃ prītiṃ praśrabdhiṃ sukhaṃ samādhiṃ yathābhūtajñānadarśanaṃ nirvedaṃ virāgaṃ vimuktiṃ copahanti. asatyāṃ vimuktau sa nirvāṇamupahanti.

āyuṣmanto yadi bhikṣurhrīmānbhavatyapatrāpī sa premagauravaṃ bhāvayati. sati premagaurave sa śraddhāṃ bhāvayati. satyāṃ śraddhāyāṃ sa samyaksaṅkalpaṃ bhāvayati. sati samyaksaṅkalpe sa samyaksmṛtisamprajanyaṃ bhāvayati. sati samyaksmṛtisamprajanye sa indriyasaṃvaraṃ śīlasaṃvaramavipratisāraṃ prāmodyaṃ prītiṃ praśrabdhiṃ sukhaṃ samādhiṃ yathābhūtajñānadarśanaṃ nirvedaṃ virāgaṃ vimuktiṃ ca bhāvayati. satyāṃ vimuktau sa nirvāṇaṃ bhāvayati.

tadyathāyuṣmanto vṛkṣasya yadi bāhyatvagnopahanyate tadāsyāntartvaksampadyate, antartvaci ca sampadyamānāyāmasya kāṇḍaskandhau sāraḥ parvāṇi śākhāpalāśaṃ puṣpaphalāni ca sarvāṇi sampadyante. evamevāyuṣmanto jñātavyaṃ bhikṣurapyevameva. yadi bhikṣurhrīmānbhavatyapatrāpī sa premagauravaṃ bhāvayati. sati premagaurave sa śraddhāṃ bhāvayati. satyāṃ śraddhāyāṃ sa samyaksaṅkalpaṃ bhāvayati. sati samyaksaṅkalpe sa samyaksmṛtisamprajanyaṃ bhāvayati. sati samyaksmṛtisamprajanye sa indriyasaṃvaraṃ śīlasaṃvaramavipratisāraṃ prāmodyaṃ prītiṃ praśrabdhiṃ sukhaṃ samādhiṃ yathābhūtajñānadarśanaṃ nirvedaṃ virāgaṃ vimuktiṃ ca bhāvayati. satyāṃ vimuktau sa nirvāṇaṃ bhāvayati.

idamavocadāyuṣmāñchāriputraḥ. āttamanasaste bhikṣava āyuṣmataḥ śāriputrasya bhāṣitamabhyanandiṣuḥ.

hryapatrāpyasūtraṃ pañcamaṃ samāptam.

← ma45 
ma 
 ma47 →
Search
buddhism/ma/ma46.txt · Last modified: 2026/11/13 19:52