MĀ48 śīlasūtram

[Translated originally from the Sanskrit Sarvāstivāda Madhyamāgama to Classical Chinese by a team led by Sarvāstivāda scholar Gautama Saṃghadeva of Kāśmīra in 398CE.
Translated from the Chinese Taisho Tripiṭaka back to Sanskrit by Ramakrishnan Suryanarayanan in 2024-26.]

madhyamāgame'bhyāsasaṃyuktavarge śīlasūtraṃ saptamam.

evaṃ mayā śrutam. ekasminsamaye bhagavāñchrāvastyāṃ viharati sma jetavane'nāthapiṇḍadasyārāme.

tasminsamaye āyuṣmāñchāriputro bhikṣūnāmantrayata—āyuṣmanto yadi bhikṣuḥ śīlavipanno bhavati so'vipratisāraṃ prāmodyaṃ prītiṃ praśrabdhiṃ sukhaṃ samādhiṃ yathābhūtajñānadarśanaṃ nirvedaṃ virāgaṃ vimuktiṃ copahanti. asatyāṃ vimuktau sa nirvāṇamupahanti.

tadyathāyuṣmanto vṛkṣasya yadi mūlamupahanyate tadāsya kāṇḍaskandhau sāraḥ parvāṇi śākhāpalāśaṃ puṣpaphalāni ca sarvāṇi na sampadyante. evamevāyuṣmanto jñātavyaṃ bhikṣurapyevameva. yadi bhikṣuḥ śīlavipanno bhavati so'vipratisāraṃ prāmodyaṃ prītiṃ praśrabdhiṃ sukhaṃ samādhiṃ yathābhūtajñānadarśanaṃ nirvedaṃ virāgaṃ vimuktiṃ copahanti. asatyāṃ vimuktau sa nirvāṇamupahanti.

āyuṣmanto yadi bhikṣuḥ sampannaśīlo bhavati so'vipratisāraṃ prāmodyaṃ prītiṃ praśrabdhiṃ sukhaṃ samādhiṃ yathābhūtajñānadarśanaṃ nirvedaṃ virāgaṃ vimuktiṃ ca bhāvayati. satyāṃ vimuktau sa nirvāṇaṃ bhāvayati.

tadyathāyuṣmanto vṛkṣasya yadi mūlaṃ nopahanyate tadāsya kāṇḍaskandhau sāraḥ parvāṇi śākhāpalāśaṃ puṣpaphalāni ca sarvāṇi sampadyante. evamevāyuṣmanto jñātavyaṃ bhikṣurapyevameva. yadi bhikṣuḥ sampannaśīlo bhavati so'vipratisāraṃ prāmodyaṃ prītiṃ praśrabdhiṃ sukhaṃ samādhiṃ yathābhūtajñānadarśanaṃ nirvedaṃ virāgaṃ vimuktiṃ ca bhāvayati. satyāṃ vimuktau sa nirvāṇaṃ bhāvayati.

idamavocadāyuṣmāñchāriputraḥ. āttamanasaste bhikṣava āyuṣmataḥ śāriputrasya bhāṣitamabhyanandan.

śīlasūtraṃ saptamaṃ samāptam.