MĀ49 gauravasūtram

[Translated originally from the Sanskrit Sarvāstivāda Madhyamāgama to Classical Chinese by a team led by Sarvāstivāda scholar Gautama Saṃghadeva of Kāśmīra in 398CE.
Translated from the Chinese Taisho Tripiṭaka back to Sanskrit by Ramakrishnan Suryanarayanan in 2024-26.]

madhyamāgame'bhyāsasaṃyuktavarge gauravasūtramaṣṭamam.

evaṃ mayā śrutam. ekasminsamaye bhagavāñchrāvastyāṃ viharati sma jetavane'nāthapiṇḍadasyārāme.

tasminsamaye bhagavānbhikṣūnāmantrayata—bhikṣavo, bhikṣuṇā sagauraveṇa vihartavyaṃ sapratīśena sabrahmacāriṣu sagauraveṇa. yo bhikṣuragauravo viharannapratīśaḥ sabrahmacāriṣvagauravaḥ, sa ābhisamācārikaṃ dharmaṃ paripūrayiṣyatīti naitatsthānaṃ vidyate. ābhisamācārikaṃ dharmamaparipūrya śaikṣaṃ dharmaṃ paripūrayiṣyatīti naitatsthānaṃ vidyate. śaikṣaṃ dharmamaparipūrya śīlaskandhaṃ paripūrayiṣyatīti naitatsthānaṃ vidyate. śīlaskandhamaparipūrya samādhiskandhaṃ paripūrayiṣyatīti naitatsthānaṃ vidyate. samādhiskandhamaparipūrya prajñāskandhaṃ paripūrayiṣyatīti naitatsthānaṃ vidyate. prajñāskandhamaparipūrya vimuktiskandhaṃ paripūrayiṣyatīti naitatsthānaṃ vidyate. vimuktiskandhamaparipūrya vimuktijñānadarśanaskandhaṃ paripūrayiṣyatīti naitatsthānaṃ vidyate. vimuktijñānadarśanaskandhamaparipūrya nirvāṇaṃ sākṣātkariṣyatīti naitatsthānaṃ vidyate.

yo bhikṣuḥ sagauravo viharansapratīśaḥ sabrahmacāriṣu sagauravaḥ, sa ābhisamācārikaṃ dharmaṃ paripūrayiṣyatīti sthānametadvidyate. ābhisamācārikaṃ dharmaṃ paripūrya śaikṣaṃ dharmaṃ paripūrayiṣyatīti sthānametadvidyate. śaikṣaṃ dharmaṃ paripūrya śīlaskandhaṃ paripūrayiṣyatīti sthānametadvidyate. śīlaskandhaṃ paripūrya samādhiskandhaṃ paripūrayiṣyatīti sthānametadvidyate. samādhiskandhaṃ paripūrya prajñāskandhaṃ paripūrayiṣyatīti sthānametadvidyate. prajñāskandhaṃ paripūrya vimuktiskandhaṃ paripūrayiṣyatīti sthānametadvidyate. vimuktiskandhaṃ paripūrya vimuktijñānadarśanaskandhaṃ paripūrayiṣyatīti sthānametadvidyate. vimuktijñānadarśanaskandhaṃ paripūrya nirvāṇaṃ sākṣātkariṣyatīti sthānametadvidyate.

idamavocadbhagavān. āttamanasaste bhikṣavo bhagavato bhāṣitamabhyanandan.

gauravasūtramaṣṭamaṃ samāptam.