evaṃ mayā śrutam — ekasmin samaye bhagavān śrāvastyāṃ vyahārṣīj jetavane 'nāthapiṇḍadasyārāme.

tatra khalu bhagavān bhikṣūn āmantrayām āsa — ahaṃ bhikṣavo yuṣmākaṃ saptānāṃ satpuruṣāṇāṃ gatisthānāni anupadhiśeṣaṃ ca nirvāṇaṃ deśayiṣyāmi. tacchṛṇuta sādhu ca suṣṭhu ca manasi kuruta.

te bhikṣava 'evaṃ bhadanta' iti bhagavataḥ pratyaśrauṣuḥ.

bhagavān etad uvāca — katamāni sapta? iha bhikṣur evaṃ pratipanno bhavati — 'na cāhaṃ syāṃ na ca me syāt, na ca bhaviṣyāmi na ca me bhaviṣyati.' yad asti yat pūrvaṃ bhūtaṃ tat prajahāti, prahāya copekṣāṃ pratilabhate. bhavasukhe na rajyate, saṃyoge na sajjate. evam pratipannasyānuttaraṃ śāntapadaṃ prajñayā dṛṣṭaṃ bhavati, na tu sākṣātkṛtam.

evaṃ pratipanno bhikṣuḥ kutra gacchati? tadyathāpi nāma agnau prakṣiptas tuṣaḥ sahasā jvalita eva nirvāṇam āpadyate. evam evāyaṃ bhikṣur draṣṭavyaḥ. alpe 'smimāne 'prahīṇe pañcānām avarabhāgīyānāṃ saṃyojanānāṃ prahāṇād antarāparinirvāyī bhavati. idaṃ prathamaṃ satpuruṣagatisthānam ucyate. yathā satyaṃ loke vidyate.

punar aparaṃ bhikṣavo bhikṣur evaṃ pratipanno bhavati — 'na cāhaṃ syāṃ na ca me syāt, na ca bhaviṣyāmi na ca me bhaviṣyati.' yad asti yat pūrvaṃ bhūtaṃ tat prajahāti, prahāya copekṣāṃ pratilabhate. bhavasukhe na rajyate, saṃyoge na sajjate. evam pratipannasyānuttaraṃ śāntapadaṃ prajñayā dṛṣṭaṃ bhavati, na tu sākṣātkṛtam.

evaṃ pratipanno bhikṣuḥ kutra gacchati? tadyathāpi nāmādīptāt saṃprajvalitāt saṃtaptāl lohapiṇḍād ayoghanenāhatāt sphuliṅga utpatitvā ūrdhvaṃ gatvā tatraiva nirvāṇam āpadyate. evam evāyaṃ bhikṣur draṣṭavyaḥ. alpe 'smimāne 'prahīṇe pañcānām avarabhāgīyānāṃ saṃyojanānāṃ prahāṇād antarāparinirvāyī bhavati. idaṃ dvitīyaṃ satpuruṣagatisthānam ucyate. yathā satyaṃ loke vidyate.

punar aparaṃ bhikṣavo bhikṣur evaṃ pratipanno bhavati — 'na cāhaṃ syāṃ na ca me syāt, na ca bhaviṣyāmi na ca me bhaviṣyati.' yad asti yat pūrvaṃ bhūtaṃ tat prajahāti, prahāya copekṣāṃ pratilabhate. bhavasukhe na rajyate, saṃyoge na sajjate. evam pratipannasyānuttaraṃ śāntapadaṃ prajñayā dṛṣṭaṃ bhavati, na tu sākṣātkṛtam.

evaṃ pratipanno bhikṣuḥ kutra gacchati? tadyathāpi nāmādīptāt saṃprajvalitāt saṃtaptāl lohapiṇḍād ayoghanenāhatāt sphuliṅga utpatitvā ūrdhvaṃ gatvā adhastān nipatann abhūmiprāpto nirvāṇam āpadyate. evam evāyaṃ bhikṣur draṣṭavyaḥ. alpe 'smimāne 'prahīṇe pañcānām avarabhāgīyānāṃ saṃyojanānāṃ prahāṇād antarāparinirvāyī bhavati. idaṃ tṛtīyaṃ satpuruṣagatisthānam ucyate. yathā satyaṃ loke vidyate.

punar aparaṃ bhikṣavo bhikṣur evaṃ pratipanno bhavati — 'na cāhaṃ syāṃ na ca me syāt, na ca bhaviṣyāmi na ca me bhaviṣyati.' yad asti yat pūrvaṃ bhūtaṃ tat prajahāti, prahāya copekṣāṃ pratilabhate. bhavasukhe na rajyate, saṃyoge na sajjate. evam pratipannasyānuttaraṃ śāntapadaṃ prajñayā dṛṣṭaṃ bhavati, na tu sākṣātkṛtam.

evaṃ pratipanno bhikṣuḥ kutra gacchati? tadyathāpi nāmādīptāt saṃprajvalitāt saṃtaptāl lohapiṇḍād ayoghanenāhatāt sphuliṅga utpatitvā bhūmau nipatito nirvāṇam āpadyate. evam evāyaṃ bhikṣur draṣṭavyaḥ. alpe 'smimāne 'prahīṇe pañcānām avarabhāgīyānāṃ saṃyojanānāṃ prahāṇād upapadyaparinirvāyī bhavati. idaṃ caturthaṃ satpuruṣagatisthānam ucyate. yathā satyaṃ loke vidyate.

punar aparaṃ bhikṣavo bhikṣur evaṃ pratipanno bhavati — 'na cāhaṃ syāṃ na ca me syāt, na ca bhaviṣyāmi na ca me bhaviṣyati.' yad asti yat pūrvaṃ bhūtaṃ tat prajahāti, prahāya copekṣāṃ pratilabhate. bhavasukhe na rajyate, saṃyoge na sajjate. evam pratipannasyānuttaraṃ śāntapadaṃ prajñayā dṛṣṭaṃ bhavati, na tu sākṣātkṛtam.

evaṃ pratipanno bhikṣuḥ kutra gacchati? tadyathāpi nāmādīptāt saṃprajvalitāt saṃtaptāl lohapiṇḍād ayoghanenāhatāt sphuliṅga utpatitvā paritte tṛṇakāṣṭha upanipatati, sa tatroparipatito dhūmāyati vā jvalati vā, jvalitvā ca tatraiva nirvāṇam āpadyate. evam evāyaṃ bhikṣur draṣṭavyaḥ. alpe 'smimāne 'prahīṇe pañcānām avarabhāgīyānāṃ saṃyojanānāṃ prahāṇāt sābhisaṃskāraparinirvāyī bhavati. idaṃ pañcamaṃ satpuruṣagatisthānam ucyate. yathā satyaṃ loke vidyate.

punar aparaṃ bhikṣavo bhikṣur evaṃ pratipanno bhavati — 'na cāhaṃ syāṃ na ca me syāt, na ca bhaviṣyāmi na ca me bhaviṣyati.' yad asti yat pūrvaṃ bhūtaṃ tat prajahāti, prahāya copekṣāṃ pratilabhate. bhavasukhe na rajyate, saṃyoge na sajjate. evam pratipannasyānuttaraṃ śāntapadaṃ prajñayā dṛṣṭaṃ bhavati, na tu sākṣātkṛtam.

evaṃ pratipanno bhikṣuḥ kutra gacchati? tadyathāpi nāmādīptāt saṃprajvalitāt saṃtaptāl lohapiṇḍād ayoghanenāhatāt sphuliṅga utpatitvā vipule tṛṇakāṣṭha upanipatati, sa tatroparipatito dhūmāyati vā jvalati vā, jvalitvā tad dagdhvā nirvāṇam āpadyate. evam evāyaṃ bhikṣur draṣṭavyaḥ. alpe 'smimāne 'prahīṇe pañcānām avarabhāgīyānāṃ saṃyojanānāṃ prahāṇād anabhisaṃskāraparinirvāyī bhavati. idaṃ ṣaṣṭhaṃ satpuruṣagatisthānam ucyate. yathā satyaṃ loke vidyate.

punar aparaṃ bhikṣavo bhikṣur evaṃ pratipanno bhavati — 'na cāhaṃ syāṃ na ca me syāt, na ca bhaviṣyāmi na ca me bhaviṣyati.' yad asti yat pūrvaṃ bhūtaṃ tat prajahāti, prahāya copekṣāṃ pratilabhate. bhavasukhe na rajyate, saṃyoge na sajjate. evam pratipannasyānuttaraṃ śāntapadaṃ prajñayā dṛṣṭaṃ bhavati, na tu sākṣātkṛtam.

evaṃ pratipanno bhikṣuḥ kutra gacchati? tadyathāpi nāmādīptāt saṃprajvalitāt saṃtaptāl lohapiṇḍād ayoghanenāhatāt sphuliṅga utpatitvā vipule tṛṇakāṣṭha upanipatati, sa tatroparipatito dhūmāyati vā jvalati vā. jvalitvā ca grāmaṃ vā nagaraṃ vā parvataṃ vā vanaṃ vā aṭaviṃ vā dahati. grāmaṃ vā nagaraṃ vā parvataṃ vā vanaṃ vā aṭaviṃ vā dagdhvā mārgaṃ vā udakaṃ vā samabhūmiṃ vā āgamya nirvāṇam āpadyate. evam evāyaṃ bhikṣur draṣṭavyaḥ. alpe 'smimāne 'prahīṇe pañcānām avarabhāgīyānāṃ saṃyojanānāṃ prahāṇād ūrdhvasrotā akaniṣṭhagāmī bhavati. idaṃ saptamaṃ satpuruṣagatisthānam ucyate. yathā satyaṃ loke vidyate.

katamac cānupadhiśeṣaṃ nirvāṇam? iha bhikṣur evaṃ pratipanno bhavati — 'na cāhaṃ syāṃ na ca me syāt, na ca bhaviṣyāmi na ca me bhaviṣyati.' yad asti yat pūrvaṃ bhūtaṃ tat prajahāti, prahāya copekṣāṃ pratilabhate. bhavasukhe na rajyate, saṃyoge na sajjate. evam pratipannasyānuttaraṃ śāntapadaṃ prajñayā dṛṣṭaṃ bhavati, sākṣātkṛtaṃ ca.

ahaṃ taṃ bhikṣuṃ na pūrvasyāṃ diśi gacchatīti vadāmi, na paścimāyāṃ na dakṣiṇāyāṃ nodīcyāṃ na vidiśi nordhvaṃ nādho gacchatīti vadāmi. sa dṛṣṭa eva dharme śāntapade parinirvāti.

yan mayoktam — 'saptānāṃ satpuruṣāṇāṃ gatisthānāni anupadhiśeṣaṃ ca nirvāṇam' iti, tena hetunaivedam uktam.

idam avocad bhagavān. āttamanasas te bhikṣavo bhagavato bhāṣitam abhyanandan.

satpuruṣagatisūktaṃ niṣṭhitaṃ ṣaṣṭham