MĀ50 gauravasūtram

[Translated originally from the Sanskrit Sarvāstivāda Madhyamāgama to Classical Chinese by a team led by Sarvāstivāda scholar Gautama Saṃghadeva of Kāśmīra in 398CE.
Translated from the Chinese Taisho Tripiṭaka back to Sanskrit by Ramakrishnan Suryanarayanan in 2024-26.]

madhyamāgame'bhyāsasaṃyuktavarge gauravasūtraṃ navamam.

evaṃ mayā śrutam. ekasminsamaye bhagavāñchrāvastyāṃ viharati sma jetavane'nāthapiṇḍadasyārāme.

tasminsamaye bhagavānbhikṣūnāmantrayata—bhikṣavo, bhikṣuṇā sagauraveṇa vihartavyaṃ sapratīśena sabrahmacāriṣu sagauraveṇa. yo bhikṣuragauravo viharannapratīśaḥ sabrahmacāriṣvagauravaḥ, sa ābhisamācārikaṃ dharmaṃ paripūrayiṣyatīti naitatsthānaṃ vidyate. ābhisamācārikaṃ dharmamaparipūrya śaikṣaṃ dharmaṃ paripūrayiṣyatīti naitatsthānaṃ vidyate. śaikṣaṃ dharmamaparipūryendriyasaṃvaraṃ śīlasaṃvaramavipratisāraṃ prāmodyaṃ prītiṃ praśrabdhiṃ sukhaṃ samādhiṃ yathābhūtajñānadarśanaṃ nirvedaṃ virāgaṃ vimuktiṃ ca paripūrayiṣyatīti naitatsthānaṃ vidyate. vimuktimaparipūrya nirvāṇaṃ sākṣātkariṣyatīti naitatsthānaṃ vidyate.

yo bhikṣuḥ sagauravo viharansapratīśaḥ sabrahmacāriṣu sagauravaḥ, sa ābhisamācārikaṃ dharmaṃ paripūrayiṣyatīti sthānametadvidyate. ābhisamācārikaṃ dharmaṃ paripūrya śaikṣaṃ dharmaṃ paripūrayiṣyatīti sthānametadvidyate. śaikṣaṃ dharmaṃ paripūryendriyasaṃvaraṃ śīlasaṃvaramavipratisāraṃ prāmodyaṃ prītiṃ praśrabdhiṃ sukhaṃ samādhiṃ yathābhūtajñānadarśanaṃ nirvedaṃ virāgaṃ vimuktiṃ ca paripūrayiṣyatīti sthānametadvidyate. vimuktiṃ paripūrya nirvāṇaṃ sākṣātkariṣyatīti sthānametadvidyate.

idamavocadbhagavān. āttamanasaste bhikṣavo bhagavato bhāṣitamabhyanandan.

gauravasūtraṃ navamaṃ samāptam.