MĀ58 saptaratnasūtram

[Translated originally from the Sanskrit Sarvāstivāda Madhyamāgama to Classical Chinese by a team led by Sarvāstivāda scholar Gautama Saṃghadeva of Kāśmīra in 398CE.
Translated from the Chinese Taisho Tripiṭaka back to Sanskrit by Ramakrishnan Suryanarayanan in 2024-26.]

madhyamāgame rājavarge saptaratnasūtraṃ prathamam.

evaṃ mayā śrutam. ekasminsamaye bhagavāñchrāvastyāṃ viharati sma jetavane'nāthapiṇḍadasyārāme.

tasminsamaye bhagavānbhikṣūnāmantrayata—yadā rājā cakravartī loka utpadyate, tadaiva saptaratnāni loke prādurbhavantīti veditavyam. katamāni sapta? cakraratnaṃ hastiratnamaśvaratnaṃ maṇiratnaṃ strīratnaṃ gṛhapatiratnaṃ pariṇāyakaratnaṃ ca. ityetāni sapta. yadā rājā cakravartī loka utpadyate, tadaitāni saptaratnāni loke prādurbhavantīti veditavyam.

evameva yadā tathāgato'rhansamyaksambuddho loka utpadyate, tadā saptabodhyaṅgaratnānyapi loke prādurbhavantīti veditavyam. katamāni sapta? smṛtibodhyaṅgaratnaṃ dharmapravicayabodhyaṅgaratnaṃ vīryabodhyaṅgaratnaṃ prītibodhyaṅgaratnaṃ praśrabdhibodhyaṅgaratnaṃ samādhibodhyaṅgaratnamupekṣābodhyaṅgaratnaṃ ca. ityetāni sapta. yadā tathāgato'rhansamyaksambuddho loka utpadyate, tadaitāni saptabodhyaṅgaratnāni loke prādurbhavantīti veditavyam.

idamavocadbhagavān. āttamanasaste bhikṣavo bhagavato bhāṣitamabhyanandan.

saptaratnasūtraṃ prathamaṃ samāptam.